Dhabta miyaan ku saaraa?

Waxaa wada qaaday Kinsi Xaaji Aadan iyo Saciid Mire Xaydar.

Dhiigiyo kalgacalkii

ee xididda dhamaystira

afka lagama dhawree,

ma ogtahay dharaarahan

markan dhaban u seexdaba

inaan kugu dhadhabayoo

dhabtayda kaa dayoo,

haddii aad dhab doon tahay

anba kuguma dhaafayn

hawlaha dhankaygee,

dhinacaaga ila qabo.

…

Walaw dhaylo aad tahay

ee haddana dhaqankiyo

dhaqashada ku wacan tahay,

dharaar aragti ma ogtahay

caashaqan wax dheerayn

dhado roob la moodo

dhalanteed inuu yahay

jacaylkii dhawaan gala

dhaxal lagama gaaree

horta dhab ma kaa yahay?

Waa inaan dhudhumiyaa.

….

Iminka dhudhumiyoo

miyaan soo dhawaadaa?

Awalba igama dheerayn,

dhabta miyaan ku saaraa?

Dhibtan kula nacayaa,

bal haddaba dhalaan sidii

dhabarkaaga igu qaad,

dhangad waan ka fududee.

….

Dhugmadiisu ruuxay

ee u dhantahay

ayuun buu dhibayaa

xishoodkuyee,

ma ogtahay dhiigayàw

dhamanaanka (dhabanaanka) awgaa

dhabeyaasha suuqyada

dhar la’aan inaan maroo,

haddii aad dhab doon tahay

anba kuguma dhaafayn

hawlaha dhankaygee

dhinacaaga ila qabo.

….

Qotan dheer qoyaaniyo

ee dhax qotama xareediyo

dhabi baxay la moodyày,

ma ogtahay dhaqsiinyuhu

haddii lacag dhalayaan

kaadsiiyuhu ma dhiciyee

dahab baan ka dhuran lehaa

jacaylkii dhawaan gala

dhaxal lagama gaaree

horta dhab kaa yahay

waa inaan dhudhumiyaa.

….

Iminka dhudhumiyoo

miyaan soo dhawaadaa?

Awalba igama dheerayn,

dhabta miyaan ku saaraa?

Dhibtan kula nacayaa,

bal haddaba dhalaan sidii

dhabarkaaga igu qaad

dhangad waan ka fududee.

Aawayhee (Raxiima Mahdi)

Aawayhee  aawayhee

inankii is arkoonayee

aawayhee

aragiis ma iloobinee

Waxaan u ooyaa

u oomaa aawadaa

isma arkeenin ayaantaan

ii imow

adaa iloobay axdigii oon leheen

inanyahow

Aawayhee

ubaxii aan abuurayee

aawayhee

aragiis ma iloobinee

Afkeyga waa ku omaa

aawadaa

amaatankaaga

an waa lee eedayee

aduunyo iyo aakhiro

axdigii oofiyee 

Shinbiryahaw

Shinbiryahaw

Ma duushaa

Ma dabayla raacdaa

Dadka maw adeegtaa

Oo maw dadaashaa.

Dalanbaabi baan ahay

Daal la dhacaayee

Kala qaad dibnaha oo

Dal yaqaan maad tahayoo

Dagmadii fogaatiyo

Meeshii laguu diroo

Dawgayd ma garataa

Shinbiryahaw dawaafee

Ku dul joogaa laantoo

Aan kuu dan sheegtoo

Dood kuu lahaadee

Ruuxaan ku daaloo

Laydiindan yahayoo

Anna aanan daynayn

Yaan doonayaayoo

Dawadaydu noqotee

Ma ii diirnaxdaayoo

Diil may galaysaa

Gudcur dam ahee

Habeen dumay

Haysu taag duleedkoo

Dabadayd u yeeroo

Qunyar daadahiyoo

Meel durugsan geeyoo

Deeqsii warkaygoo

Soo saar dushaadoo

Badda soo dabaaloo

Soo maax daruurtoo

Haashu hay dilaacdee

Soo dago agtaydaa

(Codkii: Xaliimo Khaliif Magool)

Barigaan is baranay

Barigaan is baranayiyo

Bila dhawra

Gabaryahay anigoo

Hurdada bogan

Bidhaantaada oo qura

Anigaa u buseeloo

Baal dahabi ii tahay

Jacaylku waa balaayoo

Boggiyo wadnahiyo

Anoo beerka ka jacel

Bohalyaw daraaddii

Anoo bali guryoodayoo

Heesaha baroortaan

Boostada kugu soo diraa

Hawada been u sheegaa

Baydkii aan gali lehayn

Anoo badi habeeyay

Aroos kula beegsaday

Ayaad lababogleeysayoo

Bal xusuuso inanyahay

Taariikhda dib u baar

Haka sheegin beenoo

Gayaankayga oo badan

Hablaha baarka firay

Ayaan kaala soo baxay

Waataan goor barqa

Bisha tahay laba iyo toban

Billaahi dhaarta kuu maray

Anoon hadalka sii badin

Buuraha anoon korin

Baddana kaaga sheekeeyn

Halkay u badadtayoo

Murtiduna biyadhigayso

Aan soo taabgoobtee

Buuggii aan qoray

Baalahaad ka jeexdayoo

Beertaan abuurayoo

Dhibta badan u maray baa

Mirihii ka soo baxay

Iyagoon bislaan wali

Cagafcagaf ku beegtayoo

Markaan baal kastaba dayay

Ama baaray hawlaha

Ka bilaawo haddeeriyo

Balantaan lehayniyo

Baaqii inoo yiil

Halkaasuu ku baaba’ay

Anna waan isaga baxay

“Allahuma ballagtu”

Barashiyo walaalnimo

Waa inoo barteedee.

(Cumar Cabdulle Shooli)

Waxaan Aamusnaaday

Heesaada: Binti Cumar Gacal Calasaw

"Alle!, i baday jacaylka ee inaan kugu dul ooyaa"



Waxaan aamusnaaday'oo [u luggo'ay ?] daraaddiis
Afka gacanta saaray'oo, jacayl iga adkaa'ee

Nabadarada afkooda'iyo arimadiisii
Oogada ku faafaan la adkeeysan waayay'ee

Ifka kaan ka doortay'oo ibtiladan i hayso'iyo
Eedaadka caashaqa adigaa igu beeray'ee

Markaad aragtay uun baa, inaan kuu ildaran ahay,
Waxaan uurka ka jirin i soo abaaray'ee

Haddaad dadab banaan'iyo igu dhaaftay oomane
I dishay'ee asaaggaa dadka kaagaad ugu jaceshahay

Adduunyada dusheeda istareex ku noolow!
Aniguna ayaankay!

***

Haddaad moodday Aakhiro inay ahalo leedahay
laysuma aqoonsado aabe iyo adeerkaa

Ku aamini maayaan aabe iyo adeerkaa
Adigoo arkaayana arxan kuuma galayaan

Adduunkaynu joognana ruuxii ku aaminay
Haddaan loo abaal gudin
Aakhiro aboor cunay ka ilaalin maysid'ee

Waxaan ahay asaaggaa dadka kaa ishaartay'oo
Erayadaan ku leeyahay hoos u eegi waayday'ee
Haddii iilka lay dhigo, sidii roon Rabbow eeg

Haddaad dadab banaan 'iyo igu dhaaftay oomane
I dishay'ee asaaggaa ddaka kaagaad ugu jaceshahay

Adduunyada dusheedana istareex ku noolow!
Aniguna ayaankay!

Isha Sacabka Mari

 

Heesaada: Qadro Daahir Cige
Miroha: C/qaadir Xirsi Siyaad “YamYam”
Laxanka: Axmad Saalax Qaasin


Dadkoo ururayoo
Isu tagay dhamaan
Ma ogaan karaan
Mooyee isaga.

Ayaa [way haa] uga warama?
Aramidu inay
eel dheer taqaan

Hadba waxaan arkaa
Anoo cidla’
Eri dhaban
Sidiisii kuu olalayee

Ubax baan sidaa
Kuula soo ordee
Maad iga aqbali

Eedaad kalgacal
Adaa igu unkee
Dhibtan mawga bixin!

Naftan, naftan
Naftan ku ogalee
Kuu abaajidee
Kuu abaydintaa
[hee hee hee]
Kugu indhola’
[haa haa haa]
Kugu indhola’
Usha maad u qaban?

Ifafaale iyo saad
Aragti dheer
Sida awliyaan
Kuu odarisayaa

Ayaa [way haa] ilo biyo leh
Ku agmeeroo
Oonku uga ba’ayn?

Garta odayadaa
La i soo hordhigaa
Arin yo aqoon
Afti kaa baxshee

Yay ku dhicin ilmadu
Dhir abaarsadtee
Isha sacabka mari
Eedaad kalgacal
Adaa igu unkee
Dhibtan mawga bixin!

Naftan, naftan
Naftan ku ogalee
Kuu abaajidee
Kuu abaydintaa
[hee hee hee]
Kugu indhola’
[haa haa haa]
Kugu indhola’
Usha maad u qaban?